搵食搵到上半空！新活时报Miss Sunny

Text: 新活时报MISS SUNNY　Photo: Eric

(Presented by Sky Dining 101)

香港人为咗食，可以去到几尽？无错，就係上天下海都在所不辞！今次同大家介绍返个「离地」新食点，就係喺全港最高嘅环球贸易广场101楼嘅Sky Dining 101~一上到去，就有一种居高临下嘅感觉，喺咁高望维多利亚港真係好靓呀~ 不过唔好挂住睇风景而唔记得食饭呀！Sky Dining 101全层总共有4间餐厅，4间都一样咁高质㗎~

天空龙吟

如果你係日本通，你一定有听过龙吟~ 天空龙吟就係佢哋第一间海外分店，开咗几个月就拎咗米芝莲2星，仲获选亚洲50最佳餐厅添！而家就嚟夏天，天空龙吟就特登出咗啱夏天食嘅顶级怀石料理，见到已经好开胃！

「北海道毛蟹」係大厨嘅创意之作，碟上每个元素好似蟹肉、甜番茄同柑橘啫喱嘅味道都好唔同，但估唔到鲜、甜、酸加埋一齐又好夹喎！

订座电话：2302 0222

田舍家

讲到食，日本人真係好有智慧！田舍家深信「不时不食」呢个道理，所以佢哋嘅怀石料理全部都係用最时令嘅食材整成㗎~ 而家去就可以食到以夏日作主题嘅怀石料理，由前菜、主食到甜品有成10样嘢咁多，劲丰富呀！

龙虾鲜甜又爽口，真係啱晒热辣辣嘅夏天呀~怀石料理其中一味「铁板烧原壳龙虾」，鲜味十足，食多多都唔觉腻！

订座电话：2972 2666

龙玺

一见到「为食总司令」帜哥，就知一定有好嘢食~其实帜哥除咗识食，佢开嘅龙玺一样好好食㗎！除咗食材矜贵，装修华丽之外，加埋无敌维港大海景，请人食饭一啲都唔失礼！

春风一夜情：野生笋壳鱼个名真係好过瘾呀！野生笋壳鱼係特登喺沙巴自设渔船捉返嚟，先用药材同香料腌足一晚，再风乾同煎香，工序劲繁複，呢啲功夫菜而家真係好难搵㗎！

订座电话：2568 9886

波士厅•101

唔想做死一世打工仔？去波士厅食饭，你都可以做老闆…… 一晚咁多哈哈！波士厅出名顾客至上，服务好到不得了，仲连续两年拎到「米芝莲星级食肆」，好多明星都係熟客仔嚟添~

招牌菜砂锅乾迫海斑由大厨独家创作，锅底铺满蒜子，一开盖阵香味真係无得输！海斑再淋上秘製酱汁，仲鲜味过原汁原味嘅蒸鱼！

订座电话：3955 1755

后记：

难得上到101楼食饭咁大阵仗，大家记住相机跟身呀！因为除咗有无敌大海景可以疯狂影相之外，啲菜式卖相都好靓好值得影完放上facebook呃like㗎！

ICC环球贸易广场

地址：九龙柯士甸道西1号环球贸易广场(ICC)101楼

上一篇：搵赞助？ 问过旅游记者未？＠杜游珍 下一篇：搵食攻略：马粪海胆、活帆立贝